Адразу тры лясгасы Гомельскай вобласці - Хойніцкі, Камарынскі, Лоеўскі - сёння прынялі выязное пасяджэнне калегіі Міністэрства лясной гаспадаркі.
Напярэдадні гадавіны з дня Чарнобыльскай трагедыі кіруючы актыў галіны наведаў установы, якія функцыянуюць у "чарнобыльскіх" рэгіёнах.
Так, група кіраўнікоў на чале з міністрам лясной гаспадаркі Аляксандрам Куліком азнаёмілася з работай Хойніцкага лясгаса. Адным з аб'ектаў у стаў цэх дрэваапрацоўкі.
У апошні раз кіраўнік галіны быў тут яшчэ пры папярэднім кіраўніку, тады вытворчасць знаходзілася не ў самым прэзентабельным стане, а лясгас - у даўгах. Сёння сітуацыя выглядае куды лепш. Агульны стан цэха міністра парадаваў, як і тое, што на ім працягваюцца работы па мадэрнізацыі.
Аляксандр Кулік уважліва азнаёміўся з прадукцыяй, якая выпускаецца Хойніцкім лясгасам. І ацаніў яе якасць на "выдатна". А вось цэны, на думку кіраўніка галіны, істотна ніжэйшыя за рыначныя, што, у сваю чаргу, спараджае нядобрасумленныя дзеянні з боку рознага роду "перакупшчыкаў".
- З коштамі трэба папрацаваць, - паставіў задачу Аляксандр Кулік.
Кіраўнік галіны паставіў задачу падняць выручку Хойніцкаму лясгасу. Яна складае 1,2 млн рублёў, у той час як паводле ацэнак ДВЛГА можа быць 1,6-1,7 млн рублёў штомесяц. Таксама міністр даручыў актывізаваць работы па навядзенні парадку ўздоўж дарог.
У рамках выязнога пасяджэння калегіі Мінлясгаса кіраўнік галіны таксама наведаў некалькі лясніцтваў, азнаёміўся з інфраструктурай Доміка паляўнічага і работай гадавальніка.
Другая група кіраўнікоў на чале з першым намеснікам міністра лясной гаспадаркі Аляксандрам Драгуном наведала Лоеўскі лясгас. Работа ў гэтай установе пачалася з азнаямлення з Лоеўскім доследна-вытворчым лясніцтвам. У праграме наведвання яшчэ некалькі аб'ектаў - Прыдняпроўскае лясніцтва, дрэваапрацоўчы цэх, дзе ўжо дадзена ацэнка добраўпарадкаванню падраздзяленняў. Нягледзячы на станоўчую ацэнку, дадзеную ў цэлым, аб'ектам лясгаса, без заўваг не абышлося. Першы намеснік міністра выявіў непарадак з вядзеннем пажарнай дакументацыі і запатрабаваў ухіліць недахопы.
Трэцяя група кіраўнікоў на чале з намеснікам міністра лясной гаспадаркі Уладзімірам Крэчам працавала ў Камарынскім лясгасе. Удзельнікі азнаёміліся з тым, як наладжана ў лясгасе перапрацоўка драўніны, а таксама яе ўлік і кантроль за перамяшчэннем. Быў наведаны дрэваапрацоўчы цэх, лесапункт і РММ. Тут, а таксама ў наведаных лясніцтвах, была нададзена немалая ўвага пытанню выканання мерапрыемстваў па добраўпарадкаванні.
Пацікавіўся намеснік міністра ў адказнага дзяжурнага ПГС, як складаецца пажарная абстаноўка гэтымі днямі. Спецыялісты запэўнілі, што даныя, якія падае "Лясны вартавы", вывучаюцца старанна, а сілы і сродкі ў поўнай гатоўнасці.
Яшчэ больш дэталяў - у нашым telegram-канале.
