Паважаныя калегі! Дарагія ветэраны!
Віншую з Днём абаронцаў Айчыны і Узброеных Сіл Рэспублікі Беларусь!
У гэтыя дні мы шырока ўшаноўваем тых, хто не па чутках ведае, што такое трымаць зброю ў руках. Школа арміі для многіх стала і сапраўднай школай жыцця, якая назаўжды прышчапіла такія якасці як дысцыпліна, вытрымка і адказнасць.
На шчасце, навыкі, атрыманыя ў войску, нам не даводзіцца ўжываць у баі. Гледзячы на тое, як неспакойна сёння ў свеце, а ўзброеныя канфлікты, нібы запалкі, успыхваюць адзін за адным у розных частках свету, у якi раз усведамляеш: як жа нам пашанцавала нарадзіцца і жыць у міралюбнай Беларусі!
Наша маленькая краіна - сапраўдны востраў міру і згоды на карце Еўропы. Мы беражліва ставімся да спадчыны, якая дасталася нам ад продкаў, дрыгатліва засцерагаючы сваё права на мірнае і спакойнае жыццё.
Для гэтага нам даводзіцца, у тым ліку, "ваяваць" на іншым фронце: эканамічным. І наша "лясная армія" – а гэта 35 тысяч чалавек – робіць усё, каб гэты бой быў паспяховым. Мы рацыянальна ставімся да ляснога багацця краіны, робячы ўсё, каб яно прыносіла максімальную фінансавую аддачу дзяржаве. А тое прынцыповае стаўленне да лясных рэсурсаў, якое дэманструе Кіраўнік дзяржавы, толькі падганяе нас да дасягнення яшчэ больш значных вынікаў у рабоце.
Дарагія лесаводы! Я дзякую кожнаму з вас за вашу працу і ведаю, што мы і далей будзем ісці адной камандай і будаваць сваю будучыню разам. Я ганаруся тым, што ў лясной гаспадарцы працуюць сапраўдныя патрыёты сваёй краіны, гатовыя ў любы момант абараніць любімую Беларусь ад любых выклікаў і пагроз.
Са святам! З Днём абаронцаў Айчыны і Узброеных Сіл Рэспублікі Беларусь!
З павагай, Міністр лясной гаспадаркі Аляксандр Кулік
